| 1er Couplet :
Ainsi l'aut' jour eun' pauv' dintellière
In amiclotant sin p'tit garchon
Qui, d'puis tros quarts d'heure n'faijot qu'braire,
Tâchot d'l'indormire par eun'canchon.
All'i dijot "Min Narcisse,
D'main, t'aras du pain n'épice
Du chuc à gogo
Si t'es sache at qu'te fais dodo."
2eme Couplet :
Et si te m'laich' faire eun' bonn' semaine
J'irai dégager tin biau sarrau
Tin patalon d'drap, tin giliet d'laine
Comm'un p'tit milord te s'ras farau !
J't'acat'rai l'jour de l'ducasse
Un Porichinelle cocasse
Un turlututu
Pour juer l'air du capiau pointu.
3eme Couplet :
Nous irons dins l'cour Jeannette à Vaques
Vir les marionnettes. Comme te riras
Quand t'intindras dire "Un doup' pou' Jacques
!"
Pa' l' porichinell' qui parl' magas !
Te li mettras dins s'menotte
Au lieu d'doupe, un rond d'carotte !
I t'dira : "Merci !"
Pinse comme nous arons du plaisi !
4eme Couplet :
Et si par hasard sin maître s'fâche,
Ch'est alors Narcisse que nous rirons !
Sans n'n'avoir invi', j'prindrai m'n'air mache,
J'li dirai sin nom et ses sournoms,
J'li dirai des fariboles
I m'in répondra des drôles,
Infin, un chacun
Verra deux pestac' au lieu d'un.
|
5eme
Couplet : Allons serr' tes yeux, dors
min bonhomme,
J'vas dire eun' prièr' à P'tit Jésus
Pour qu'i vienne ichi pindant tin somme
T'faire rêver qu'j'ai les main plaines d'écus.
Pour qu'i t'apporte eun' coquille
Avec du chirop qui guile
Tout l'long d'tin minton
Te t'pourlèqu'ras tros heures ed'long !
6eme Couplet :
L'mos qui vient, d'Saint-Nicolas, ch'est l'fiête,
Pour sûr, au soir, i viendra t'trouver.
I t'f'ra un sermon, et t'laich'ra mette
In d'zous du balot, un grand painnier.
I l'rimplira si t'es sache
D'séquois qui t'rindront bénache,
Sans cha sin baudet
T'invoira un grand martinet.
7eme Couplet :
Ni les marionnettes, ni l'pain n'épice
N'ont produit d'effet. Mais l'martinet
A vite rapajé l'petit Narcisse
Qui craingnot d'vir arriver l'baudet.
Il a dit s'canchon-dormoire,
S'mère l'a mis dins s'n'ocheinnoire
A r'pris sin coussin
Et répété vingt fois ch'refrain.
|
Le monument fut
érigé en 1902 par Eugène Deplechin au
bout du Square Foch, en bordure de la rue Nationale à
LILLE dont la partie basse de l'original se trouve
actuellement dans le grand hall de l'Hôtel-de-Ville.